وقفه مع الشاعروالاعلامی قاسم الرشیدی
خوة هالوکت
رکّز یا گلب لوردت خوّة طیب مو کلمن یگلک طیّب تصدگه
وها بالک تغشک برگة الأیام لو چلّت لیالي تنمحی البرگه
گلب البیه طیب ملفلف من سنین لابد بیه توجد للأخو حرگه
کون تشوف بسمه من الأخو بملگاک،
ما عافک اخوک الضیگـّـت خلگه
وعن درب الأخوة الشات یصبح ضیع
ودروب الغریبه الماشي تزلگه
والویاک چان مشارکک برضاع گالو هذا اخوک
ومثل ما تلگه
**************
گال تحـّمل الطعـنات لا تهتز ولو بسیوف تطبّر
ومد ضلعک جسر عالموت سهـّل للأخو المعـبر
یاعارف گلت شتــــــگول حدر من الضلع خنجر
.....لو یعبر خاف یگص روحه.....
وخوة هالوکت شو مدري چنها شلون اخیّک
بالطمع شو محد یلحگه
حگک ماخذه النوب اصبحت مطلوب
یومیه ویجیک یطالب بحگه
گالو مانشوفک تمدح الأخوان ...
وحزامک اخوک بساعة الملگه
البعض گالو عضیدک تفگة الردمات وشلونک
تهد وخالیه الفگه
البعض گالوأخیّک فشگه صوب أعداک
عاف أعداک! صوبک صوّب الفشگه
البعض گالو أخوک البي تشد الراس
ماردنه الشداد شلون بالفلگه
أخوک بزودأخوک تفوي سبع ابحوروشلونک
خویک وسط بحرالظیم عمداً بلمک یغرگه
وهي الطعنات کلهه من الأخوه ارداف
والتا ذیک هیه من الأخو الطگه
انا المدیّت ادّی لمصافح الخوان
بس ردیّت چفي بحسرة الشبگه
*******
جرح گلبی نزیف وحیــــــــل یدّی
علی عضیدی الجفانی وشتم یدّی
گلت لاباس اله ومدّیـــــــــت یدی
دفعنی وشال سچیـــــــــــنه علیه
ولکم ذاک اخوي المدري بیه منین
مارافگ خویّه الطاسة الدبگه
ولکم ذاک اخوي الینادیني بألوف الناس
وشمحله یخویه اللایگه بحلگه
اخوک اللي شریچک بالألم خاویه .....
مو عنده الدقیقه سنین بالفرگه
آیا فرگة الخوان تعمي العین وتخــّلي ونینک یشبه الورگه
وین اچفوف تلگه تنشف الدمعات
ووین دموع تلگه اعلیک مندفگه
گلبی اعلی المضی بحسرات یوسف
وصبح مطعـون مدری برمح یوسف
علمونه الأخـــــــــــوه اخوان یوسف
ودرس عباس عفنـــــــــــــا یم أخیه
گبل نهتات عندک یاگلب حسوک!!؟
غم رایک یخایب بطل الشهگه
بسک یاگلب ومعاتبک شیفید
والیمته بحسرتک یا گلب تبگه .
---------------
مدونه الادیب