مشارکه من الشاعروالاعلامی ابوموعود الرشیدی

 

نداء الضمیر

----------------

صیحه چانت دوّت بذان الضمیر

                                 وطرزت یا سیدی لون السمه

بیاض ابطک بان والوادم تشوف

                              المایشوفک لاایشوفک بالعمه

انت شتله الشالتک هادی البشیر

                       وعودک اترعرع علی الکلفه ونمه

یاعلی وداعة علی ماخاف اگول

                                  حتی جبرائیل چنت اتعلمه

موسی بن عمران بس گلک دخیل

                             وانت گتله شلون ربه ایکلمه

صیری یاهالنار بردا والسلام

                          یعنی حیدر گوم طفی المضرمه

انت امک کعبة الباري الجلیل

                              وهیچي لروتین گالو فاطمه

سیفک یصلی باذان المعضلات

                         ولمسة اچفوفک تراهی تشیّمه

العنده ازمات کثرن ذبهن علیک

                          مودراعک یلوّة چف الموزمه

انت خواض الملاحم والصعاب

                          وانت ابو الحسنین حمای الحمه

                       الشاعرابوموعود الرشیدی                                   

رساله من الاخ الشاعر ابوموعود الرشیدی

طینة الولاء 

انا شاعر والقلم واللـیل اخوی

واعرفتنی الوادم بطیبة هلی

تعلمّت منهم اجــد هذا الطریــق

والیعوف اهله ودربهم یبتلی

چنت یاهل وسمع حچایات ابوی

وراسی من غیرة هلی مملی ملی

تونی امشی وارکض ومرات اطیح

ولا مثل امی شفت یهتم الی

گالو اندب هالأسم کلما تطیح

من ثلاثة احروف والهم ینجلی

هالثلاثة حروف دینک والصلاة

بعین لام ویا راسک یعتلي

دیر بالک ساعة لتفوتک بلاش

وبیهه ماتذکر اسم اول ولی

شما تصلی شما تأدی الواجبات

شما یطول الگصب یرجع لاولي

انت ربک عجن طینک بالولاء

وشیفید الگلب لو صبح خلي

عاهدت نفسی وانا بذیچ السنین

شما گعدت شما گمت اندب علی

 الشاعروالاعلامي ابوموعود الرشیدی

رساله من الاخ الشاعر ابوموعود الرشیدی

علي اسوالفک یا ترف عمات
وصرت مثل الی عنده امس عمات
سبع خالات عندی وثلث عمات
الرمش عینک اضحیهن سوية
::::::::::::::::::::::::::::::::
اتعبت لمن حصــلت اعلیک ولما
شفتک...ای هنـــالی الزاد والما
یسویها البخت وتصیــــــر والما
اذب روحی وتذب روحک علیه
×××××××××××××××××××
 
الشاعر الاستاذ ابوموعود الرشیدی من مدینه المحمره

بیعه النخیل

 

روعة من روائع الشاعر المبدع قاسم الرشيدي تحت عنوان

«بیعة النخیل»

گلــّــب بالمحاچی الفات والمافات

                          وانشدها الثریا اتعرف ناصیتی

انا الشیعی الموالی شماتمر ریاح

                            ما طیع الهوا تندار ساریتی

قصیدة انا الکتبها النخل بالأرواح

                             عاین للسعف تلگاه قافیتی

وانا الهور العشگ صفنات گمرة لیل

                            وتغازل نجوم اللیل بردیتی

انا الشیمة التعلت فوگ نجم سهيـــل

                         یتباهه الگمر بخیوط خاچیتی

جبل آنه بصبر وشلون اطخ الهام

                            لسفوح الرمال وتلعب بنیتی

عاین للسما وشتشوف بیه نجوم

                           یتمرجح نجمها بخیط چفیتی

وانا ربات المنابر مااهبط الراس

                         لشموخ اشوامخ مرتفع صیتی

علمنی الحسن میه هله بکل ضیف

                         مضرب للمثل بالکرم صینیتی

وعلمنی الحسین اتلاوه وی الظیم

                         مختومه بفضل عباس تضحیتی

وهذاک آنه الولاء الحیدر الکرار

                        وأرقه اعلی المعالی بزود شیعیتی

ولئن باب الصمیدة اوجرت بیه النار

                   اطلب ثار،مو بیت الزچیه ینحسب بیتی

ما عوفن هلی و ما عوف نهج حسین

                              حدر من الضلع برکان تعزیتی

انا اربات النخیل البایعت مولای

                           ما تشرب مذله عروگ بر حیتی

جبت عمرک یخایب لعب عالحبلین

                              حسبالک تغیـّر بیک وضعیتی

بس الأید أمدها الحیدر الکرار

                               حیثیتی، بعلی الکرار حیثیتی

هذاک آنه التربه بزود ابو الحملات

                          أی والله من ابو الحسنین تربیتی

و تراب اجدام قنبر یا أبا الحسنین

                          کحل عینی و کحل لعیون أهالیتی      

 ابو موعود الرشیدی

منقول من موقع الشاعرالعرادی

حلم غبشه

حلم غبشه
چنی طول ابطول نتمشه اعلی شطنه الأید بید
حلم غبشه وموبعید
--------------------
انت ریحة نخل حینه اللفلفه غبار الزمان
أنتِ حنیّة أهلنا السامحت عثر اللسان
انتِ عین الما تغیّض بیها بس الشوگ بان
أنتِ سمرة وکل سمارچ ندري معناه الحنان
وانتِ ثوب امنه العجوزة المعرفت نص الردان
أنتِ دله وسیف وعگال وعجید
چنی طول ابطول نتمشه اعلی شطنه الأید بید
حلم غبشه وموبعید
--------------------
انتِ أخت ذاک ایحّسب دوم جاراته الخوات
أنتِ زود البیه وبجاله خواته امأمنات
أنتِ عصابة اعلی شیله وبویمه وهوسة بنات
أنتِ نشمیة التنـّخت هلهلت بالمعضلات
أنتِ دمعة فرح لالت علی خدود المهات
أنتِ شهگة هله اولیدي الاگت الردمن بعید
چنی طول ابطول نتمشه اعلی شطنه الأید بید
حلم غبشه وموبعید
------------------------
أنتِ تذکار من أهلنا وأنتِ گعدات المضیف
أنت ِدمعات الغریب البات لیله اعلی الرصیف
أنتِ نسمات العذیبي الهبّت بمسوم خریف
أنتِ هلهوله بسلفنا الفززت حلمي اللطیف
أنتِ خوة بمالة الله وأنتِ عفة کل عفیف
آنه اشوفچ أنتِ وردة البالحسن نوعچ فرید
چنی طول ابطول نتمشه اعلی شطنه الأید بید
حلم غبشه وموبعید
-----------------------------
أنتِ اُمنیة الجمیلة مدثرة بماضی السنین
أنتِ حسنچ کل جمالچ ینحسب دُر الثمین
أنتِ شَعره من الجدایل ناگعة بعرگ الجبین
أنتِ گلب الأم لبنها الیمطر أشواگ وحنین
أنتِ شَذرة محبس العِز لایگه بچف الیمین
أنتِ والله گلادة حلوة البالمشي تلاعب الجید
چنی طول ابطول نتمشه اعلی شطنه الأید بید
حلم غبشه وموبعید
-----------------------------
أنتِ من دنیا المحاسن حاویةعیون الغزال
أنتِ بعیون الطبیعة انمثلچ نسمة شمال
أنتچف دافي اللمسة وأنتِ لضماي الزلال
أنتِ سچة ودرب صافي شلون اعوفنچ محال
أنتِ موجة شط صفنتي اللاعبت جُرف الخیال
أنتِ عین الدنیا عینچ بیها الگه شما أرید
چنی طول ابطول نتمشه اعلی شطنه الأید بید
حلم غبشه وموبعید
-----------------------------
أنتِ حنطة وملح گاعي وسنبله وگطرات دیم
أنتِ چف فلاح نشمي البیه أثر تعب القدیم
أنتِ فطرة البالنوایة تعشعش بگلب السلیم
أنتِ سالوفة حبایب یاورت شفة ندیم
أنتِ گربچ فرح زفة وبُعدچ نسمیه ظیم
أنتِ یا صفنة الطویلة مطرزة بمطلع قصید
چنی طول ابطول نتمشه اعلی شطنه الأید بید
حلم غبشه وموبعید
-----------------------------

لا تنشدینی اعلی حالي منین أجیت منین أعود
آنه کل ساعة اعلی ساعة هموم دلالي تزود
آنه مامرتني فرحة ولاشفت لحظة سعود
آنه بسمه اعلی الشفایف نِکتت ویاها العهود
وآنه لو مامرني طیفچ عگبه شلـّي بهالوجود
بعد هم اگعد واتاني وجیتچ لعیونيِ عید
چني طول بطول نتمشه اعلی شطنا الأید بید
حلم غبشه ومو بعید
-----------------------------

کلمات الاخ الشاعرقاسم الرشیدی(ابوموعود)